LAOAG CITY – Inpasigurado ti grupo dagiti negosiante ken professionals idiay Hawaii a mangbukbukel iti Pacific Century Fellows wenno PCF nga umay dagitoy agbuya iti Himala sa Buhangin a maysa kadagiti kangrunaan nga aktibidad iti benneg ti turismo ditoy Ilocos Norte.
Segun ken ni Mrs. Rhona Leigh Bueno, mangidadaulo ti Provincial Investment Office ti Provincial Government of Ilocos Norte wenno PGIN, mismo a ni Gob. Matthew Marcos Manotoc ti nangawis iti nasao a grupo.
Inbatadna a mamati ti gobernador a ti “trade and investment” ket mangrugi iti turismo.
Mangnamanama ni Bueno nga apaman nga adda ti nasao a grupo ditoy probinsia ken agpasiarda kadagiti nagduduma a lugar ket ditoy a makitada no ania dagiti oportunidad a mabalin a serreken ti grupoda.
Malaksid iti daytoy, inpalgakna a kalikagum pay ti nasao a grupo a maam-ammo dagiti gunglo dagiti negosiante ken professional ditoy probinsia tapno matingitingda no ania ti kasayaatan a negosio a mabalinda nga isayangkat ditoy probinsia.
Kabayatanna, inbunannagna nga iti umuna a paset ti tawen 2025 ket maysa pay a grupo dagiti negosiante idiay Hawaii ti Filipino Chamber of Commerce in Hawaii ti agplanplano nga umay mangiyuswat iti “business symposium” iti Ilocos Norte.
Inlawlawagna nga arigna maiyasping iti Pacific Century Fellows ti kalikagum dagitoy nga aramiden iti iyuumayda ditoy probinsia.
Nupay kasta, kunana a ti nasao a grupo ket kiniddawda nga adda ti maisayangkat a pannakailawlawag dagiti nadumaduma a “trade and investment” a mabalin a maidiaya ti Ilocos Norte.
Mainaig iti daytoy, impalgak ni Bueno a planoda nga awisen dagiti dadduma pay a lugar ditoy Pilipinas a maibilang a “sister province/city” ti Hawaii.
Mangnamnama a kalpasan ti panag-host ti probinsia ket sumaruno met nga ag-host dagiti dadduma a lugar.
Innayonna nga iti agdama ket adda ti maysa a “tele-health company” a tultulungan ti opisinada.
