LAOAG CITY – Mamati ti Philippine National Police (PNP) a mabilbilangen ti aldaw ni Kingdom of Jesus Christ leader Pastor Apollo Quiboloy a mapapati nga aglemlemmeng iti underground bunker ti Kingdom of Jesus Christ Compound kalpasan a na-detect ti ‘heartbeat’ daytoy.
Segun ken ni PNP Region XI Spokesperson Catherine Dela Rey, na-detect ti heartbeat ni Quiboloy kalpasan nga inusar ti Philippine National Police ti ground-penetrating radar-da iti underground bunker nga adda iti Kingdom of Jesus Christcompound no sadinno nga iti agdama ket birbirukenda ti pagserrekan ti bunker.
Inbatadna nga iti kinapudnona, adu nga heartbeats ti na-detect iti bunker nga indikasion a posible nga adda iti uneg ti daga ti paglemlemmengan ni Quiboloy.
Nadakamat a ti ground penetrating radar ket makabukel ti imahe iti babaen ti radar pulses ken makitana pay ti heartbeats, tignay ken heat signature.
Naammoan a tallo a protesters ti inarestar gapu iti inaramidda a pananglapped ken panangdangran kadagiti pulis.
Kabayatanna, adda ti pito a pulis ti nagsagaba ti sugat kadagiti nagduduma a paset ti bagida kalpasan a rinaut dagiti miembro ti Kingdom of Jesus Christ isuda idi bimmara ti tension iti naisayangkat a prayer ken lightning rally iti sangoanan ti compound.
