LAOAG CITY – Nagkedked ti International Criminal Court pre-trial chamber ti kiddaw ti legal team ni dati a Presidente Rodrigo Duterte a paigetan ti “victim verification process” iti imbestigasion daytoy iti napasamak a “war on drugs.”
Iti maysa a 20 a panid a pammilin a nairuar idi Abril 17, inaprobaran ti pre-trial chamber ti International Criminal Court ti nairekomendar a listaan dagiti dokumento ti “Registry” a mabalin nga usaren tapno iberipikar ti pakabigbigan dagiti biktima a gagem a makipaset iti panangtingiting.
Inbatad ti chamber nga umdas ti detalye ti International Criminal Court Registry iti kada dokumento pakairamanan ti sample format kas pammaneknek ti pakabigbigan para kadagiti aplikante a biktima.
Inpetteng ti chamber nga inkiddaw ti International Criminal Court Registry nga awaten ti maysa a deklarasion a pinirmaan ti dua a saksi pakairamanan ti pakabigbiganda a mangipaneknek iti identification ti aplikante wenno ti pakainaiganna iti biktima gapu iti kinakurang ti “standard identification documents.”
Naammoan a kas sungbat iti inlungalong ti Registry, inpaganetget ti abugado ti depensa ni Duterte a ni Nicholas Kaufman a ti “non-sequential” list ti ID ti Registry ket saan a patas.
Mainaig iti daytoy, ti kaso a crimes against humanity kontra ken ni Duterte ket saan a bumaba iti 43 a kaso dagiti panagpatay nga adda ti koneksionna iti Davao Death Squad ken dagiti tignay ti pulisia idi nakatugaw kas Presidente.
Inpaayan ti pre-trial chamber ti prosekusion ti agingga inton Hulio 1 tapno isubmitir ti amin nga ebidensia kontra ken ni Duterte a mausar iti kumpirmasion iti panagdengngeg kadagiti kaso a naikeddeng inton Septiembre 23.
