LAOAG CITY – Maibilangen a drug free dagiti amin a 559 a barangay ti Ilocos Norte.
Segun kenni Police Chief Insp. Dexter Corpuz, hepe ti police community relations ti Police Provincial Office, daytoy ket sinertipikaran ti Municipal Anti-Drug Abuse Council (MADAC).
Nupay kasta, kuna na a manarimaan pay laeng ti panangvalidate ti Philippine Drug Enforcement Agency ti sertipikasyon nga inted ti MADAC.
Kinumpirmaran ni Corpuz a bimmaban ti drug menace ti probinsya ken bimmaba dagiti imonmonitor ti PNP.
Innayon na a ngimmina ti street value ti shabu gapu ta umaboten ti 15 ribo a pisos agingga ti 20 ribo a pisos iti kada 5 a gramo ti shabu.
Ti dati nga street value na ket umabot ti 5 ribo a pisos agingga ti 7 ribo a pisos.
Kinumpirmaran ni Police Chief Insp. Corpuz, hepe ti Police Community Relations Office ti INPPO nga 62 a porsiento ti nalpas ti Philippine Drug Enforcement Agency iti panangvalidate kadagiti sertipikasyon.
Daytoy ket basar kenni Agent Lanibel Ancheta, provincial officer ti PDEA.
Inlawlawag ni Corpuz a maibayag laeng ti validation gapu ta adda dagiti saan nga agpada a datus ti PDEA ken datus ti PNP.
Mainaig iti daytoy, inpakaammo ni Corpuz a gagem ni Provincial Director Police Sr. Supt. Jose Melencio Nartatez Jr. nga umuna a maideklara ti Ilocos Norte kas drug free iti rehiyon uno.
Nupay kasta, inadmitir ni Corpuz a saan a 100 a porsiento a mapugipog ti iligal a druga ditoy probinsya.
Innayon na a makita ti epekto na babaen ti panagbaba ti crime rate ken sumagmamanon to laeng dagiti matiliw nga target personalities.
