LAOAG CITY – Manamnama ti panagllepas ti paset ti impeachment case iti maipagarup sangsangoen a grave threats ni Vice President Sara Duterte sakbay nga agleppas ti bulan ti Hulio.
Segun ken ni Senate impeachment court spokesperson Atty. Reginald Tongol, immalisto ti proseso kalpasan ti panangibabawi ti prosekusion dagiti innem a testigoda para iti Article 4 ti impeachment complaint.
Gapo iti daytoy, manamnama nga umakar ti panagusig iti sumaruno nga alegasion a maipagarup saan nga umno a panagusar ti confidential funds ti Office of the Vice President (OVP) ken ti Department of Education (DepEd).
Basar iti Article 1 ti impeachment complaint, maakakusaran ni VP Sara iti maipagarup panaglabsingna iti public trust ken ti graft and corruption gapo iti maipagarup saan nga umno a panangusar ken panang-liquidatena iti P500 million a confidential funds ti Office of the Vice President ken iti P112.5 million met a manipud iti Department of Education.
Gapo iti daytoy, isagsaganan ti prosekusion dagiti tallo nga agtestigo para iti sumaruno na alegasion ken ni VP Sara.
Karaman ditoy da Marivic Pareja ti Legislative Archive Museum ti House of Representatives; Violeta Constantino, dati a manager ti Landbank Shaw Boulevard ken ni Leonita Camposano, dati a manager ti Landbank DepEd branch.
Kabayatanna, inbatad ti Senate President ken ni presiding officer Chiz Escudero nga maiprisintar dagiti ebidensiada ti depensa inton maiprisintar ti prosecusion dagiti amin nga articles-da.
