LAOAG CITY – Inpetteng ti House prosecution panel a saan a rumbeng a maitantan wenno maapektaran ti aniaman a panagsukat iti liderato ti Senado ti agtultuloy a proseso ti impeachment trial kontra ken ni Vice President Sara Duterte.
Segun ken ni Lanao del Sur Representative Zia Alonto Adiong, ti pannakangiwat ti panel, ti laeng kalikagom da ket maidasar a sibubukel ken awan ti pannakaitantan dagiti ebidensya ken testigo iti sangwnan ti Senate impeachment court.
Inlawlawag ni Adiong a karbengan dagiti umili a maamoan dagiti ebidensya, ken karbengan met ti bise presidente a saan a maitantan ti panangusig kenkuana.
Innayon na a ti impeachment ket pammaneknek nga awan ti siasinno man nga opisyal, nangato man ti posisyon, ti makaliklik iti pagsungsungbatan iti babaen ti Konstitusyon.
Inrakurak daytoy ti kongresista kalpasan ti report nga agplanplano ti minority bloc ti Senado nga ipatugaw ni Senador Sherwin Gatchalian kas Senate President kasukat ni Senador Alan Peter Cayetano, a naipatugaw laeng iti pwesto idi Mayo 11.
Inpaganetget ni Adiong nga “internal dynamics” ti Senado ti isyu ti liderato ken respetaren daytoy ti Kamara de representantes ti naisina nga institusyon.
Naikeddeng nga isumitir ni Vice President Duterte ti sungbat na iti Articles of Impeachment intono Hunyo 1, 2026 idinto a temporaryo ngem in-schedule ti Senado ti panangrugi ti pre-trial proceedings intono Hulyo 6, 2026.
