LAOAG CITY – Inpalgak ti Ecowaste Coalition nga agtultuloy ti iseserrek dagiti imported paints iti lokal a merkado nga addaan iti nangato a lead content.
Daytoy ket iti laksid ti nabayagen a panangiparit ti pagilian kadagiti pintura a naglaon iti lead.
Segun iti grupo, adda lima a variant ti brand ti pintura a “made in China” a kontaminado iti lead a lumablabas iti regulatory limit a 90 Parts Per Million (PPM).
Iti nabiit pay a test buy, nakagun-od ti grupo iti pito a kolor ti Top Standard Spray Paint iti tunggal maysa a chain store idiay Pulilan, Bulacan Province.
Nupay adda marka a naaramid idiay China, awan ti naited nga impormasion no siasino ti agar-aramid ken agiwarwaras iti nadakamat a produkto.
