LAOAG CITY – Manarimaan ti pannakaiyakar dagiti poste ti kuriente a nadalapus iti pannakaipalawa ti kalsada iti ili ti Piddig.
Segun ken ni Mr. Cipriano Perry Martinez, Acting General Manager ti Ilocos Norte Electric Cooperative wenno INEC, nakapagsaritadan iti Department of Public Works and Highways maipanggep iti nasao a banag.
Inlawlawagna nga awan ti problema iti pannakaiplastar gapu ta agbaybayad met ti nasao nga ahensia ti gobierno.
Inbatadna a naiget ti koordinasionda iti Department of Public Works and Highways tapno saan a maibayag ti pannakaipatungpal kadagiti proyekto ken saan nga agbalin a lapped iti road widening.
Maipalagip a naruay dagiti maiyakar a poste ti kuriente iti ili ti Piddig gapu ta nadalapus dagitoy iti pannakaipalawa ti kalsada.
