LAOAG CITY – Nagballigi dagiti otoridad a nangarestar iti maysa a lisensyado nga inhinyero ken ti live-in partner na iti naisayangkat nga anti-illegal drug buy-bust operation iti ili ti Solsona.
Segun ken ni Police Major Chris Anthony Sorsano, ti pannakangiwat iti Ilocos Norte Police Provincial Office, ti inhinyero ket agtawen ti 43 idinto a ti live-in partner na ket agtawen ti 42.
Inbatad ni Sorsano a nakumpiskar da iti ikot dagiti aglive-in partner ti sumuruk-kumurang 3 a gramo ti maipagarop a shabu a mapatta-patta nga agbalor ti 20,400 a pisos.
Mainaig iti daytoy, inpakaammo ni Sorsano nga immunan a naarestar ti nasao nga inhinyero ditoy ciudad ti Laoag ita laeng a tawen, ngem nakarwar iti pagbaludan babaen ti plea bargaining agreement.
Innayon ni Sorsano a kalpasan a nakarwar iti pagbaludan ti inhinyero ket saan latta a nagsardeng iti illegal nga aktibidad na basar iti agtultuloy a panangmonitor kenkuana dagiti otoridad.
Iti agdama, nagtalinaed dagiti aglive-in partner iti kustodyar ti Philippine National Police iti ili ti Solsona kabayatan a maisagsagana ti reklamo a maipila kontra kadakuada.
