LAOAG CITY – Addan ti inisyal a balor dagiti nadadael iti imprastraktura ken agrikultura iti ili ti San Nicolas iti iduduprak ti bagyo Carina ken epekto ti abagat.
Daytoy ti inpakaammo ni Mayor Mike Hernando iti ili ti San Nicolas.
Segun ken ni Mayor Mike Hernando, iti biang ti infrastructure projects ket mapatta-patta nga umaboten iti 10.7-milyon a pisos ti balor dagiti nadadael iti iduduprak ti bagyo.
Kuna na a karaman ditoyen ti nadadael nga slope protection iti paset ti Barangay 16 iti nadakamat nga ili.
Inpakaammo ni Hernando a no iti met sektor ti agrikultura ket adda ti 9.2 nga ektarya a naapektaran a kaadoan kadagitoy ket pagmulaan ti nateng ken prutas a nalungsot dagiti nasao a produkto gapu iti kalamidad.
Mainaig iti daytoy, kuna ti mayor nga adda ti 75 a pamilya ti naapektaran gapu iti pannakalayos ti lugar da a gubuay ti bagyo Carina.
Kabayatanna, nagyaman ni Mayor Hernando iti kooperasyon ken pannakimaymaysa dagiti umili iti panawen ti kalamidad nga ibilang na a tulbek iti panagballigi da iti iduduprak ti bagyo Carina.
