LAOAG CITY – Umaboten iti innem ti bilang dagiti naireport a pimmusay kalpasan ti iduduprak ti Bagyo Uwan ditoy Pilipinas.
Basar iti datos manipud iti National Disaster Risk Reduction and Management Council (NDRMMC), tallo ti nairekord a natay manipud iti Cagayan Valley ken saggaysa met manipud iti Bicol, Western Visayas ken Eastern Visayas.
Malaksid kadagiti natay, umabot met iti 13 a tattao ti naireport a nasugatan.
Gapu iti daytoy, nasurok a dua a milyon nga indibidual wenno 600,000 a pamilia ti naapektaran iti Rehion Iloco, Cagayan Valley, Cordillera Administrative Region, Central Luzon, Metro Manila, CALABARZON MIMAROPA, Bicol, Western Visayas, Negros Island Region, Eastern Visayas, Zamboanga Peninsula, Northern Mindanao, Caraga, ken Bangsamoro Autonomous Region in Muslim Mindanao.
Ti kangatuan a bilang dagiti naapektaran nga indibidual ket nairekord idiay Bicol a dimmanon iti nasurok a maysa a milion, sinaruno ti Negros Island Region ken Eastern Visayas.
Kadagiti naapektaran a pamilia, nasurok a 200,000 ti adda pay laeng kadagiti evacuation centers idinto a dadduma ket nasurok a 78,000 a pamilia ti nagkamang kadagiti dadduma a lugar.
Iti damage assessment ti ahensia, nasurok a 4,000 a balay ti naipadamag a nadadael, no sadinno nasurok a 3,000 kadagitoy ti partially damage idinto a nasurok a 700 ti naan-anay a nadadael.
No maipapan iti koriente, mapaspasaran pay laeng ti kaawan ti suplay iti 394 a lugar a naapektaran iti bagyo.
Basar iti National Disaster Risk Reduction and Management Council, nasurok a P48 million ti naipaayen ti gobierno a tulong para kadagiti biktima ti bagyo.
