LAOAG CITY – Nasugsugatan dagiti innem nga estudyante kalpasan a naitapwak ti nagluganan da a pampasahero a tricycle iti deraas a paset ti Brgy. 23 San Andres iti ili ti Sarrat.
Nabigbig ti driver ti tricycle a ni John Paul Gino y Pablo, agtawen ti 22 estudyante iti Piddig National High School ken residente iti Brgy Estancia iti ili ti Piddig.
Nabigbig met dagiti nakalugan iti tricycle a da Jerome Martin agtawen ti 14, residente iti Brgy. Mangitayag, Ricardo Jacinto, agtawen ti 18, residente iti Brgy. Callusa, Junix Marata kenni Christian Martin agpada a residente iti Brgy. 5 iti nasao nga ili.
Basar iti imbestigasyon, bayat ti panangiturong ni Gino ti tricycle nga addaan ti side car number 183-18 ket nadanun da ti agsalog nga agkurba a paset ti kalsada.
Maipagarup a naawanan ti kontrol ti driver iti manibela ti tricycle rason a naitapuak da iti derraas.
Dagus a naitaray da iti ospital gapu kadagiti sinagaba da a sugat kadagiti nagduduma a paset ti bagi da.
Basar iti PNP, damo dagiti maseknan iti dumalan iti nasao a barangay road ken agturong da koma iti Vintar dam iti ili a Vintar.
