LAOAG CITY – Agarup 600 nga indibidual a Tricycle Operators and Drivers Association (TODA) ditoy siudad ti Laoag ti nagatendar ti taripnong iti Ilocos Norte Police Provincial Office para iti panagsagsagana ti probinsia para iti 2025 National and Local Elections ken ti mapaspasangasangan a Palarong Pambansa a maangay ditoy probinsia.
Segun ken ni P/Maj. Sheryl Guzman, pannakangiwat ti Ilocos Norte Police Provincial Office, gagem ti Ilocos Norte Police Provincial Office a mapalagipan ken maipakaammo kadagiti traysikelan ti responsibilidad dagitoy kas public utility driver nga indauloan ni Provincial Director P/Col. Frederick Obar.
Inlawlawag ni Guzman a dakkel ti tulong dagiti tricycle drivers iti Philippine National police kas ti panangipakaammoda dagiti agar-aramid ti maikanniwas iti linteg.
Innayonna a nasken a naiget a surotenda dagiti fare guide tapno awan ti agbalin a problema dagiti pasaheroda.
Mangnamnama ti Ilocos Norte Police Provincial Office a mapagtalinaed ti linak, urnos ken talna kabayatan ti Palarong Pambansa a maiyuswat ditoy probinsia babaen ti tulong ti komunidad.
