LAOAG CITY – Inbatad ni Mr. Justino Dumlao, ti presidente ti Asosasyon dagiti Mannalon ti tabako iti ili ti Solsona a nasolbaren ti problema da mainaig iti utang da nga abono.
Immuna iti daytoy, inbaga ni Dumlao nga adda ti 1.5-milyon nga ayuda nga inkari ti lokal a gobierno iti ili ti Solsona para kadakuada nga agtaltalon ti tabako ngem agpapan ita ket saan pay a naited.
Nupay kasta, inbaga ni Dumlao a nakasarita dan ni Mayor Joseph de Lara ket nagkari met a bayadan ti munisipyo dagiti utang da nga abono.
Innayon na a ti palawag kadakuada ti mayor ket naitantan ti pannakabayad dagiti utang da nga abono gapu iti covid19 pandemic.
Gapu iti daytoy, inbaga ni Dumlao a nasolbaren ti problema da ken nalawlawagan dan.
