LAOAG CITY – Nangipaay ni General Manager John Teodoro ti Ilocos Norte Water District ti jug ken drum kadagiti residente iti ili ti Solsona.
Segun kenkuana, babaen iti daytoy ket adda ti mausar dagiti residente iti panagsakdo dagitoy.
Inbatadna a sakbay pay a naideklara iti ili ti Solsona iti babaen ti State of Calamity ket rinugiandan ti nangipaay ti empty chlorine drums kadagiti maseknan nga umili.
Inlawlawagna a nakikoordinar daytoy kada Mayor Joseph De Lara ken Vice Mayor Jonathan De Lara iti nasao nga ili tapno alaen dagiti empty chlorine drums ken empty chlorine jugs babaen iti Municipal Disaster Risk Reduction and Management Office nga isu ti nakailugan dagitoy.
Mainaig iti daytoy, kuna ni Teodoro a pinalubusanda ti Bureau of Fire Protection iti ili ti Solsona a mangala iti tangkeda ngem 20 a porsiento laeng ti mabalin a makonsumoda.
Gapu iti daytoy, kunana a mapalubusanda a mangala ti agingga 20 cubic meters manipod iti tangkeda no sadino mabalinda nga agkarga ti maminlima a daras.
Innayonna a dagiti consumers ti Ilocos Norte Water District iti ili ti Solsona ket awan met dagiti maaw-awatda a parikot maipapan iti panagpukaw ti suplay ti danum.
