LAOAG CITY – Inpakaammo ni Bombo International News Correspondent Elvie Pregua manipod idiay Israel nga adda ti plano ti gobierno ti Israel a bumales kalpasan ti panangisayangkat ti airstrike ti Iran iti pagilianda.
Nupay kasta, kunana a laplapdan ti Estados Unidos iti daytoy a tignay ti Israel tapno saanen a kumaro pay ti mapaspasamak a situasion iti dua a pagilian.
Segun kenkuana, inabisoan ti Philippine Embassy dagiti Overseas Filipino Workers idiay Israel a saan pay laeng a rumrummuar kadagiti pagtaenganda wenno pagpapaayanda a pasdek tapno maliklikan nga adda ti saan a napintas a mapasamak kadakuada.
Inbatadna nga addan dagiti lugan a panggubat ti Estados Unidos a nakabantay iti boundary ti Iran tapno malappedan ti nabara a rinnupak dagiti dua a pagilian.
Kunana nga awan dagiti naipadamag a nasugatan ken nadadael iti pannakaiwayat ti airstrike ti Iran gapu iti iron dome.
Inlawlawagna a gapu iti agdama a situasion iti nagbaetan ti Israel ken Iran ket nakanselar ti flights iti erupuerto ken klase dagiti pagadalan ngem adda dagiti sumagmamano a serrek dagiti pangopisinaan.
Innayonna a no adda ti mangngegda a napipigsa a putok ket mapanda iti shelter bomb nga isu ti natalged a lugar a pagkamanganda.
