LAOAG CITY – Agpada a nangiwayat ti missile ken airstrike ti Iran ken Israel, maysa nga aldaw kalpasan a nangirubuat ti Israel ti nalawa nga air offensive kontra iti nabayagen a kalaban daytoy.
Iti nasao a panangatake, natay dagiti sumagmamano a commanders ken scientists ken binomba dagiti nuclear site ti Iran a basar iti rakurak ti Israel ket paset ti gagem daytoy a lappedan ti panangbukel ti atomic weapon ti nasao a pagilian.
Inpetteng ni Israeli Prime Minister Benjamin Netanyahu a ti naiwayat a panangatake ti Israel ket nangpabayag iti nuclear program ti Iran ken mabalin a maitantan daytoy iti sumagmamano a tawen.
Dinayaw ni United States President Donald Trump dagiti panangatake ti Israel kontra iti Iran ken nagballaag nga ad-adda pay a kumaro ti tignay no saan nga insigida nga awaten ti Iran ti dakkel a panangkissay iti nuclear program-da a maysa a kondision a nabayagen nga ipetpetteng ti Estados Unidos kadagiti maipapan iti diplomatiko a rugian koma ita a lawas.
Basar kadagiti dua nga opisial ti Estados Unidos, ti United States kas kangrunaan a kaalyado ti Israel ket timmulong iti panangpabagsak kadagiti missile ti Iran.
Nagkari ti Iran nga agibalesda iti naiget nga opensiba ti Israel idi Biernes no sadinno a nadadael ti nuclear ken militar ti pagilian ken naperdi dagiti atomotic plants ken base militar.
