Inbatad ti aktor a ni Joaquin Domagoso nga awan pulos ti panagbabawi na iti panagbalin na a nasapa nga ama gapu ta daytoy ti ibilang na a kapatgan a misyon iti biagna.
Iti “Fast Talk with Boy Abunda”, inlawlawag na nga iti panagbalin nan nga ama ket ad-adda pay nga ingaed na ti agubra.
Kuna ni Joaquin a saanen a mabalin nga aramiden na ti kas kadagiti ar-aramiden na idi awan pay ti responsibilidad na nga agtrabaho laeng no mayat ti rikna na.
Inpalgak pay ti aktor nakaragragsak gapu ta ammo na nga agur-uray ti anak na iti panagawid na manipod iti trabaho.
Inpasigurado ni Joaquin a saan a makaapektar ti lovelife na iti trabaho na ngem saanen a nangipaay pay ti naan-anay a detalye maipapan iti daytoy.
Maipalagip a tawen 2022 idi inrakurak ni Isko Moreno nga addan ti anak ti baron na a ni Joaquin iti nobya na a ni Raffa Castro.
Iti maysa metlaeng nga episode ti Fast Talk with Boy Abunda iti napalabas a tawen ket inbatad ni Joaquin a plan-planwen da paylaeng ken ni Raffa ti panagkasar da ken saan a mabalin nga agdarasudos da no maipapan iti daytoy a banag.
Innayon na a saan a mabalin nga agdesisyon da a dagus nga agkasar gapu ta addan ti anakda gapu ta kakaasi laeng ni Raffa.
