LAOAG CITY – Nakadepende ti istratehia ti prosekusion ti kaalisto ti impeachment proceedings iti Senado.
Inbatad ni Senate President Win Gatchalian ti batang ita ket adda iti prosekusion ken nakadepende iti panagtaray ti proseso ti impeachment trial ni Vice President Sara Duterte kadagiti iparuk-at nga ebidensia.
Inlawlawagna a no makita ti prosekusion nga addaandan ti sobra a nadagsen nga ebidensia, posible a saanen a kasapulan ti dadduma pay a testigo.
Kunana a napasamak daytoy iti Article 4 ti articles of impeachment wenno ti maipagarup a grave threat ni Vice President Sara ken ni Presidente Ferdinand Marcos Jr. ken iti pamilia daytoy no sadinno a saanen a pinasango ti innem pay koma iti prosecution witnesses gapu ta umdasen dagiti testimonia ken ebidensia dagiti immuna a dimmatag a testigo.
Innayon ni Gatchalian nga immatiddog laeng ti impeachment trial days gapu ta sumurok 100 ti testigo pakairamanan dagiti ebidensia nga iprisentar ken iti kada maysa nga aldaw ket maysa a testigo laeng ti sumango depende pay no maiyalud-od daytoy iti kabigatanna gapu kadagiti rakurak pay ti testigo.
