LAOAG CITY – Maysa a festival idiay Cyprus ti nanggandat a makagun-od ti Guinness World Record iti babaen ti panagluto ken panangidasar ti Sheftalia, maysa a traditional Cypriot kebab nga adda ti kaatiddogna a 246 a kadapan.
Ti St. Lazarus and his Little Friend Savvas festival, maysa a tinawen a charity event kas pammadayaw ken ni St. Lazarus ket nagkakadua dagiti cook ken chef tapno makapartuat ti kaatiddogan a kebab a makagun-od ti world record para iti titulo a “World’s Largest Sheftalia.”
Inatendaran iti nasao nga event ti nasurok 150 nga organisasion ken institusion para kadagiti charity pakairamanan ti St. Lazarus Center for People with Disabilities.
Naammoan a ti 246 feet a Sheftalia ket kinasapulan iti agarup 30 a tattao tapno bagkaten.
Kalpasan a nakumpirmaran ti world record, pinagsasangoan daytoy dagiti nagatendar iti event ken naggegeddanda a nangan iti babaen ti panagpalaman daytoy iti pita bread.
