LAOAG CITY – Awan ti impormasyon ti kamara de representantes iti inbutaktak ni Senador Ping Lacson nga adda ti 67 a kongresista a contractor ti karaman iti maanomalya a flood control projects.
Sungbat daytoy ni House of Representatives Spokesperson Atty. Princess Abante kalpasan a nasaludsud kenkuana ti nagbalin a rebelasyon ti senador.
Inbatad ni Abante a saan a nailawlawag a naimbag ni Senador Lacson ti nasao nga impormasyon.
Inpetteng ti pannakangiwat ti Kamara de representantes nga urayen laeng no ania ti agbalin a sumaruno nga addang ti Committee on Public Accounts nga isu ti napusgan nga agimbestigar kadagiti maanomalya a flood control projects.
Ti addang ti Committee on Public Accounts ket sungbat iti nagbalin a rakurak ni Presidente Ferdinand Marcos Jr. iti maikapat nga State of the Nation Address na a kalikagom na nga agsungbat dagiti adda iti likudan dagiti palpak ken ghost flood control projects.
Basar iti nagbalin a rebelasyon ni Sen. Lacson, adda ti 67 a kameng ti kamara de representantes idi 2022 dagiti maipagarop a contractors kadagiti government-funded infrastructure projects.
Iti met biang ni Senador Erwin Tulfo ket adda ti 10 wenno nasursurok pay iti 20th Congress ti agserserbi a contractors para kadagiti government-funded projects da ngem awan ti ideya na no adda met dagiti senador a contractor.
