LAOAG CITY – Impasigurado ni House Speaker Faustino Dy III a sisasagana ti Kamara kadagiti konkreto a gakat ken tignay iti panagbitla ni Presidente Ferdinand “Bongbong” Marcos Jr. iti State of the Nation Address (SONA) daytoy.
Kuna ni Dy a daytoy ket kas panagsungbat ti pammilin ni Presidente Marcos nga iprayorida ti gakat a mangipalawa iti income tax exemption tapno mairaman ti P350,000 tunggal tawen, makissayan ti income taxes dagiti mangmangged, mailaksid dagiti babassit a negosio manipud iti minimum corporate income tax, ken maipaayan ti tax amnesty dagiti saan a nabayadan nga incometax, estate tax, donor’s tax, ken value-added tax (VAT).
Maragsakan pay ti House leadership ti tignay ni Presidente Marcos a makissayan ti singir iti kuryente iti babaen ti pannakaipasa ti gakat ti Sariling Kuryente Act para iti pannakaipasdek dagiti rooftop solar panels ken battery storage systems, kasta payen ti pannakaamendar iti Electric Power Industry Reform Act (EPIRA) tapno saan a madagsenan dagiti system loss.
Impasigurado pay ni Dy a paigetan ti Kamara ti naiget a pannakikoordinar iti Executive Branch tapno masigurado a ti tunggal gakat ket adda ti umno a pakaipapanan na ken mangpapintas iti kalidad ti panangbiag dagiti Filipino.
