LAOAG CITY – Sukimaten ti kamara de representantes no kasanu ti pannakagastos ti mauk-ukkon a binilyon a balor ti travel tax.
Daytoy ti inrakurak ni House Tourism Committee Vice Chairperson ken Palawan Rep. Gil Acosta kalpasan ti inpila a gakat ni House Majority Leader ken Presidential son Sandro Marcos tapno ikkaten ti travel tax iti pagilian.
Segun ken ni Rep. Acosta, masapol a tingitingen nga agpada ti pananggastos iti travel tax revenues sakbay ken kalpasan ti COVID-19 pandemic tapno maamoan no dagitoy ket naurnus a mailatlatang ken maus-usar para iti pannakapadur-as iti industriya ti turismo.
Innayon ti agpanpanday linteg nga adda ti P4 billion agingga iti P5 billion ti average travel tax collection iti kada tawen no sadinno a maikabkabil ti mauk-ukkon a balor ti Tourism Infrastructure and Enterprise Zone Authority, Commission on Higher Education ken cultural heritage sector.
Kuna na a sumagmamano kadagiti isyu a rumbeng a makita ti kongreso ket ti bigla a panagbaba ti koleksiyon manipod 2020 agingga iti 2023 gapu kadagiti restriksiyon a naipatungpal iti kangitingitan ti pandemiya, isut gapuna a napateg a balbaliw a maadal no kasanu a mabusbusbos dagiti pondo kadagiti naglabas a tawen ken no ania ti epekto na iti turismo.
Dinakamat pay ti agpanpanday linteg ti maysa kadagiti kangrunaan nga island destinations dagiti turista iti pagilian, ti Palawan a limitado ti government-built facilities kas ti tourism comfort room.
Mainaig iti daytoy, inpakaammo ni Rep. Acosta a plano ti tourism committee a trataren ti nasao a concerns iti baet dagiti debate no rumbeng nga ireporma ti sumagmamano a dekada a travel tax wenno naan-anayen a maikkat.
