LAOAG CITY – Immapela ti kampo ni dati a Pres. Rodrigo Duterte iti desisyon ti Pre-Trial Chamber a nangibasura iti panangkwestyun da iti hurisdiksyon ti Internatonal Criminal Court iti kaso a sangsangwen ti dati a presidente.
Ti nasao nga apela ket indaulwan da Nicolas Kaufman, ti lead counsel ken ni DR Dov Jacobs, ti Associate Counsel ni Duterte.
Kalikagom ti kampo ti dati a presidente a baliktaden ti naiparuk-at a desisyon idi Oktubre 23.
Nakailanad iti apela ni Duterte nga awan ti legal a pagibasaran ti ICC iti panangdengeg ti kaso ti dati a presidente.
Kiniddaw pay ti kampo na ti dagus ken unconditional release ni Duterte.
Maipalagip a natiliw ti dati a Presidente idi Marso 11 gapo iti crime against humanity gapo iti kampanya na kontra iti iligal a droga.
