LAOAG CITY – Kalikagum ni Sangguniang Panlungsod Member RJ Fariñas a mairaman amin dagiti residente iti Metro Gabu ditoy siudad ti Laoag ti libre nga environmental fee.
Daytoy ket kalpasan a naammoan ti konseho a dagiti laeng residente manipud iti Brgy. 35 Gabu Sur ti exempted wenno maka-avail iti nasao nga ordinansa.
Gapu iti daytoy, gagemna a maadal ken matingiting a naimbag daytoy tapno mabenepisiaran met dagiti maseknan a dadduma nga umili.
Kunana a nagkiddaw dagiti sumagmamano a residente iti Metro Gabu a no mabalbalin ket mairamanda a mailibre iti maipatpatungpal nga environmental fee.
Mainaig iti daytoy, inbatad ni Brgy. Chairman Joseph Francisco Ranada nga aniaman ti mapagnunumoan iti konseho ket sitatallugod dagitoy a mangadaptar ken mangipakat iti ordinansa.
Kabayatanna, naammoan nga iti agdama ket 20 a pisos ti masingsingir nga environmental fee ngem para kadagiti senior citizens, persons with disability ken estudiante ket adda ti 50 a porsiento a diskuento dagitoy.
