LAOAG CITY – Inanunsio ti Department of Energy (DOE) a sumangpet ditoy pagilian ita a lawas ti 300,000 bariles ti diesel nga inangkat ti Pilipinas manipud kadagiti kaparanget a pagilian.
Basar iti Department of Energy, daytoy ti umuna a daras ti langis a ginatang ti ahensia tapno masigurado ti umdas a suplay kadagiti sumaruno a bulan iti baet ti agtultuloy a tension idiay Middle East.
Iti baet daytoy, inadmitir ti ahensia a bassit laeng daytoy maidasig iti mapatta-patta nga inaldaw a konsumo ti diesel iti pagilian.
Inpaganetget ni Department of Energy Secretary Sharon Garin a kasapulan a maaddaan ti strategic oil reserve ti pagilian tapno masigurado ti agtultuloy a suplay ti petrolyo.
