LAOAG CITY – Naladingit ti baro a tawen ni Mr. Wilson Paguirigan, maysa a mannalon ken residente iti Brgy. 30-B, Sta. Maria ditoy siudad ti Laoag kalpasan a natakawan ti kurong-kurong.
Segun ken ni Paguirigan, pasado ala una itay parbangon a simrek iti pagtaengan da kalpasan a nasarabo ti tawen 2023.
Inbatad na a naudi ken nabati iti ruar dagiti kaannakan na ken saan na a masinunuo ti oras a simrek dagitoy.
Kuna na naibati met iti sango ti pagtaengan da ti kurong-kurong na agraman ti tulbek daytoy ken naliwayan a nai-lock.
Mainaig iti daytoy, inpakaammo ni Paguirigan nga idi nakariing ket mapan koma agibelleng ti basura ken usaren na ti kurong-kurong ngem dita a naduktalan na a mapukpukaw daytoy.
Kuna na a dagus a nagsaludsod kadagiti kakadua na iti pagtaengan da ken kadagiti karruba nu adda ti nakakita ngem arig nga awan ti nakapuot iti pannakaitaray ti kurong-kurong na.
Gapu iti daytoy, inbatad na nga iberipikar na ti cctv iti barangay da ken nagkamang metten iti kapulisan ditoy siudad para iti al-alisto a pannakabirok ti lugan na.
Immunan nga inpakaammo ni Paguirigan a tawen 2017 idi adda kenkuana ti kurong-kurong ken nu adda ti mangbulod ket kanayun a maipakada.
Naamoan a ti nasao a kurong-kurong ket addaan plate No. nga AO 2007 ken maysa a TMX 155 nga agmarid ti nalabbaga.
