LAOAG CITY – Natay ti maysa a lalaki a nangiturong ti kurong-kurong kalpasan a nadesgrasia iti Barangay Liliputen iti ili ti Pinili.
Binigbig ni P/Maj. Antonio Marzan, Hepe ti Pinili Municipal Police Station ti biktima a ni Cecilio Miguel Lacuesta, agtawen ti 56, naasawaan, mannalon, tubo ti Barangay Barangay Madupayas iti ili ti Badoc ngem agdama nga agnanaed iti Barangay Bomitog iti ili ti Banna.
Inbatad ni P/Maj. Marzan a basar iti inwayatda nga imbestigasion, kabayatan a dumaldalyasat ti nangiturong ti kurong-kurong nga agpa-daya iti paset ti Pinili-Nueva Era Road iti Barangay Liliputen iti ili ti Pinili ket kellaat daytoy a napukawan ti kontrol ti manibela.
Gapu iti daytoy, kunana a nagsagaba ti nakana a sugat iti nagduduma a paset ti bagi ti biktima kangrunaanna iti ulona.
Naitaray iti kaasitgan nga ospital ti biktima ngem naideklarar a dead on arrival.
Mainaig iti daytoy, rumrummuar a nagalis ti kalsada idi napasamak ti desgrasia gapu ta napigsa ti tudo.
Kabayatanna, saan met pay a masinunuo dagiti otoridad no nabartek wenno saan ti biktima.
