LAOAG CITY – Sumango iti agsusukot a kaso ti maysa a baro kalpasan a tinutukan na ti pellet gun ti nakariri na iti maysa a pasken idiay Barangay 16, San Marcos, San Nicolas, Ilocos Norte.
Nabigbig ti suspek a ni Wilmer Simon y Bernabe, agtawen iti 30, baro, mannalon idinto a ti biktima ket ni Rolando Ibe Jr., agtawen iti 34, naasawaan, construction worker ken agpada dagitoy a residente ti nasao a barangay.
Iti imbestigasyon, nagturong ti biktima kadwa na ti asawa a ni Maricel iti maysa a pasken iti met laeng nasao a barangay.
Kabayatan ti panaggiinom ti suspek ken biktima ken dagiti sumagmamano a kakadwa da ket adda ti nabara a diskusyon dagiti dua ket inasot ti suspek ti bassit a paltog iti siket na ket intutuk na ti biktima kalpasan na ket pimmanaw iti lugar.
Nangiyuswat ti hot pursuit operation dagiti otoridad ket natiliw da ti suspek iti met laeng nasao a lugar ken naala da iti ikot na ti maysa a 1911 pistol immitation wenno Pellet Gun.
Gapu ti daytoy, sumango ti suspek iti kaso a grave threat, Republic Act 10592 ken Comelec Gun ban.
