LAOAG CITY – Nagballaag ti City Health Office ditoy siudad ti Laoag kadagiti umili kontra iti leptospirosis kalpasan dagiti layus ken iti kinapateg ti panangsalaknib iti bagi manipud iti kontaminado a danum.
Segun ken ni Dr. Rodrigo Catcatan, mangidadaulo ti City Health Office ditoy siudad a nangipaayda ti doxycycline for prophylaxis of leptospirosis kadagiti nagdalus iti Bengang Creek ken kadagiti flood-prone a barangay gapu ta mabalin a kontaminado iti danum gapu iti layus.
Binalakadanna dagiti umili a masapul nga agusar ti personal protective equipment (PPE) kas ti botas no rummuar wenno agtrabaho iti nalayus a lugar tapno maliklikan ti pannaka-expose iti kontaminado a danum.
Mainaig iti daytoy, inbatad ni Dr. Catcatan a dagiti kangrunaan a sintomas ti leptospirosis ket ti panaggurigor, panagsakit ti bagbagi ken dadduma pay.
Innayonna a dakkel ti posibilidad a maliklikan ti pannakaala ti sakit no uminum ti nasao nga agas iti uneg ti 24 agingga 72 nga oras kalpasan ti pannaka-expose.
Kabayatanna, kunana nga adda ti naan-anay a suplayda ti nasao nga agas kontra iti leptospirosis para kadagiti umili a makasapul kadagitoy.
