LAOAG CITY – Inpanakkel ni Police Supt. Edwin Balles, ti chief of police ditoy ciudad ti Laoag a maikapat ti ciudad a kaadoan ti masolsolbar a kaso iti intero a pagilyan.
Kuna na a saanna a nalawag kadakuada no ania ti nagibasaran dagiti nagpili ngem mamati a gapu ta maysa ti ciudad kadagiti maibilang a katalgedan a ciudad.
Inlawlawag na a sipud idi Enero agingga ita a bolan ket nakairekord dan ti 836 a kaso, basbassit no ikompara dagiti nairekord da idi 2015 ken 2016.
Segun kenkuana, manipod iti nasao a bilang ket 87.32 percent ti crime clearance idinto a 85.17 percent ti crime solution.
Kuna na a kayat a sawen ti crime clearance ket nabigbig da ti suspek, naikaso da ti korte ngem saan da a natiliw idinto a ti crime solution ket adda ti naipila da a kaso ken natiliw da ti maysa kadagiti suspek.
