LAOAG CITY – Inpakaammo ni Mrs. Mary Jane Leaño, mangidadaulo ti City Tourism Office ditoy siudad ti Laoag a mangisayangkatda ti recital para iti programa a Just Be Active Summer.
Inbatadna a maiyuswat inton bigat, aldaw ti Sabado ti recital iti dakkel a mall ditoy siudad a pakabuyaan iti panagsala ken panagkanta dagiti makipaset idinto nga inton Domingo ket adda met ti friendly match dagiti nakipartisipar kadagiti nagduduma nga sports kas ti basketball, volleyball ken dadduma pay.
Kunana a dakkel a nakatulong daytoy a programa para kadagiti agtutubo ken ubbing ditoy siudad gapu ta ditoy a naasa dagiti talentoda.
Gutgutigoten ni Leaño dagiti umili a mapan agbuya tapno makita dagiti agkakapintas a performance dagiti ubbing.
Innayonna nga agpaut ti 20 nga aldaw daytoy a programa ti gobierno siudad babaen ti Laoag City Tourism Office ken Community Affairs Office.
