LAOAG CITY – Maiyuswat ti libre a kugit inton Mayo 16 agingga Mayo 17 nga idauloan ti First District Congressional Office ken makibinnulig iti lokal a gobierno ditoy siudad ti Laoag.
Segun ken ni Ms. Janeth Retamal, ti Population Commission Officer ditoy siudad a 300 dagiti mabalinda nga akomodaren.
Inbatadna a sakbay a makugit ti maysa a lalaki ket dumalan pay laeng nga umuna dagitoy iti pre-screening.
Inlawlawagna a maiyuswat ti panagkugit iti Laoag City General Hospital ngem nasken a mapan pay laeng iti First District Congressional Office para iti pannakaipalista ti naganda.
Kunana nga ipangpangrunada nga akomodaren dagiti residente ditoy siudad ti Laoag ngem no bilang adda dagiti agpakugit a saan a taga ditoy ket akomodarenda latta.
Innayonna a malaksid iti nasao nga aktibidad ket addanto met ti maiyuswat nga Operation Tuli nga idauloan mismo ti lokal a gobierno.
