LAOAG CITY – Mangididiaya ti libre ken confidential nga Human Immunodeficiency Virus testing iti lokal a gobierno iti ili ti Banna iti intero a bulan ti Pebrero kas paset ti kampania kontra iti panagwaras ti virus.
Ginutigot ni Mayor Mary Chrislyn Abadilla dagiti residente nga agpakonsultar iti laboratorio ti Municipal Health Office a nakalukat iti office hours manipud iti oras ti alas-8 ti bigat agingga iti alas-5 ti malem.
Inbatadna nga agduduma ti sintomas ti Human Immunodeficiency Virus depende iti tukad ti impeksion ken inpaganetgetna a ti panagpakonsultar laeng ti sigurado a wagas tapno maammoan ti kasasaad ti maysa a tao.
Basar iti datos ti Provincial Health Office, umaboten iti 461 ti nairekord a kaso ti Human Immunodeficiency Virus ditoy Ilocos Norte sipod idi 1984 pakairamanan ti 22 a baro a kaso idi 2025.
Naammoan a kaadoan kadagiti baro nga impeksion ket manipud kadagiti agtawen ti 25 agingga iti 34 idinto nga adda pay ti nairekord nga agtawen ti 15 agingga iti 24.
