Limitado a koleksyon iti LCGH, rason iti pannakaitantan ti 14th month pay dagiti empleado – City Accounting Officer

LAOAG CITY – Inbatad ni Ms. Loelyn Acain, ti mangidadaulo iti City Accounting Office ditoy siudad ti Laoag ti saan pay a pannakaited ti 14^th month pay kadagiti permanent employees iti Laoag City General Hospital.

Segun ken ni Acain, gapu ta economic enterprise ti Laoag City General Hospital ket agdepende ti pannakaited ti sweldo wenno bonus dagiti empleado iti koleksyon ti ospital.

Kuna na nga iti agdama ket limitado ti koleksyon ti ospital rason a saan pay a maited amin ti benepisyo wenno sweldo dagiti empleado.

Kabayatanna, inpakaammo ni Acain a nu man adda ti koleksyon ti ospital ket kanayun a maiprayoridad ti maited a karbengan dagiti empleado.

Immuna iti daytoy, inbunannag ni Acain a nu pay adda ti general fund ti local a gobierno ditoy siudad ti Laoag para iti nasao nga ospital ket saan a masuportaran amin daytoy ti pagkasapulan ti Laoag City General Hospital kangrunaan iti sweldo dagiti empleado.