LAOAG CITY – Maragsakan ni Liga ng mga Barangay President Ryan John Pascua kas Chairman ti Committee on Transportation nga iti panangrugi ti “joyride” ditoy probinsia ket napintas ti feedback ti publiko.
Segun ken ni Pascua, adda dagiti taxicab a nanggundawayen iti daytoy nupay awan pay ti nag-apply a tricyCab.
Maipalagip a nakisosyo ti gobierno probinsial ti Ilocos Norte iti JoyRide Philippine Corporation, maysa nga information technology firm a mangpatpataray iti online ride-hailing platform, tapno mangidiaya ti taxicle services ditoy probinsia.
Iti babaen ti partnership, mabalin nga asidegen nga ag-book dagiti commuters iti tricycle rides babaen ti JoyRide app kalpasan ti pannakapirma ti Memorandum of Agreement iti nagbaetan ti gobierno probinsial ken ti kompania.
Immuna iti daytoy, inaprobaran ti Sangguniang Panlalawigan ti maysa a resolusion tapno palubusan ni Gov. Cecilia Araneta Marcos a makipinnirma ti Memorandum of Agreement iti nagbaetan da iti Joyride, nga inbagian ti Bise Presidente daytoy para iti Business Development for Mobility a ni Menard Takayasu Umali, para iti operasion ti JoyRide taxicle services iti Ilocos Norte.
Naammoan a nangisayangkat ti JoyRide ti maysa a bulan a pilot test ditoy siudad ti Laoag ken dagiti asideg nga ili idi 2023 no sadinno a kabayatan daytoy ket dimmalan dagiti nakipaset a drayber iti public safety training.
