LAOAG CITY – Inlungalong ni Parañaque 2nd District Rep. Brian Yamsuan ti House Bill 7868 a gagem a mangbukel ti long term plan tapno masolbar ti kinakurang dagiti libro iti pampubliko a pagadalan ken masigurado a dagiti learning materials ket maiyannatop iti kasapulan dagiti agad-adal.
Iti babaen ti gakat, agbinnulig a mangbukel ti Department of Education (DepEd) ken National Book Development Board (NBDB) ti National Textbook and Learning Resources Plan a mangikeddeng kadagiti pagannurotan tapno masigurado nga umdas ti suplay dagiti libro ken regular a panagsukat kadagitoy iti kada lima a tawen.
Insingasing met ni Yamsuan ti panagpalawa ti panagimprenta kadagiti libro iti region level no posible tapno mapapigsa ti produksion iti Visayas ken Mindanao.
Nakaipalaon iti gakat ti in-inot panagakar iti private sector ti panangipablaak ken distribusion dagiti libro iti uneg ti tallo a tawen idinto a bantayan daytoy ti National Book Development Board.
Karaman iti gakat ti panangbigbig ti electronic publications kas libro, panangbukel kadagiti materyales para kadagiti estudiante nga adda ti rangkap ti bagina ken panangestablisar ti Textbook Review Committees tapno siguradoen ti kalidad ken panagbalin a maiyannatop dagiti libro nga usaren kadagiti pampubliko a pagadalan.
Kuna ni Yamsuan a napateg a maaddaan ti napateg ken dekalidad a libro tapno maipangato ti kabaelan iti panagbasa dagiti agad-adal ken masolbar ti nabayagen a parikot iti kinakurang dagiti learning materials kadagiti pampubliko a pagadalan.
