LAOAG CITY – Balligi a linukatan ti Colombia ti kampanya da iti FIFA World Cup 2026 kalpasan a dinomina na ti kabarbaro a team nga Uzbekistan, iti iskor a 3-1, iti laban da a naiyuswat iti Mexico City Stadium.
Kontrolado ti Los Cafeteros ti laban iti panangidaulo ti star player na a ni Luis Díaz.
Iti maika-40 a minuto ti umuna a paset ti ay-ayam, nakaiserrek ti maysa a goal ti Colombian player a ni Daniel Muñoz kalpasan a sinippaw na ti maysa a napintas a pannakaipasa manipod ken ni Díaz.
Dagus met a simmubbot ti Uzbekistan.
Iti maika-60 a minuto ket nakaaramid ti pakasaritaan ni Abbosbek Fayzullaev kalpasan a naiserrek na ti kaunaan a goal ti Uzbekistan iti pakasaritaan ti FIFA World Cup, a nangitunda ti panagtabla ti laban iti 1-1.
Nupay kasta, saan nga inpalubos ti Colombia nga agpaot ti selebrasyon ti kalaban da ken kalpasan laeng ti lima a minuto ket nakaiskor ni Diaz agingga nga inleppas da ti ay-ayam nga iggem da ti balligi.
Gapu iti panangabak ket solo nga idadaulwan ti Colombia ti Group K gapu iti iskor na a tallo a puntos.
