LAOAG CITY – Maisayangkat iti masungad a Pebrero 13 ti Sirib Awards ita a tawen 2023.
Segun ken ni Mr. Randy Labasan, maysa kadagiti agserserbi iti Ilocos Norte Youth Development Office wenno INYDO, daytoyen ti maikasangapulo a daras a pannakaisayangkat ti nasao nga aktibidad.
Inlawlawagna a nairanta daytoy a panangipaay ti pammigbig kadagiti agtutubo a nangabak iti national ken international wenno nangipaay ti pammadayaw iti probinsia a naiget a supsuportaran ti Gobierno Probinsial.
Kunana a mabalin pay daytoy a pakaipaayan ti pammigbig kadagiti nangibagi iti pagilian a taga ditoy probinsia ken dagiti karaman kadagiti top notchers kadagiti board examinations.
Inbatadna nga agpatingga iti masungad nga Enero 29 ti panagawatda iti nominasyon dagiti nagdumaduma a gunglo, institusyon ken dagiti umili.
Immuna iti daytoy, inpakaammo na a nangipatulod da ti surat iti nagdumaduma a pagadalan pakairamanan dagiti nagdumaduma nga ili ken siudad pakaseknan iti panangipaay manen ti probinsia ti pammigbig kadagiti agtutubo ken naipakaammo pay daytoy iti Sirib Express page.
Kuna ni Labasan a karaman kadagiti maipaayan ti pammigbig dagiti nangabak iti umuna agingga iti maikatlo a puesto ken dagiti nangibagi ti pagilian kadagiti nagdumaduma nga “international program.”
Inlawlawagna a dagiti kategoria para iti Sirib Awards ket national individual, national group, international individual, international group licensure top notcher ken special awards.
Innayonna a malaksid iti maipaay a certificate ket adda pay ti “cash incentive” a maipaay ken itay napalabas a tawen ket adda pay ti medalia a naited kadagiti napadayawan.
