LAOAG CITY – Inpasingked ti Malakanyang nga agtultuloy ti panangbirbiruk ti gobierno ken ni dati a kongresista Zaldy Co iti baet ti panangi-archive ti Sandiganbayan iti graft case kontra kenkuana gapu ta napaay dagiti otoridad a nangarestar iti uneg ti nasurok nga innem a bolan.
Inbatad ni Palace Press Officer Undersecretary Claire Castro a saan a baybay-an dagiti otoridad ti trabaho da a mangbiruk ken ni Co, a sumangsango kadagiti kaso a graft ken malversation mainaig iti maipagarop a maanomalya a road dike project iti Naujan, Oriental Mindoro.
Inpetteng pay ni Castro a ti panang-archive ti kaso ket maysa a procedural nga addang laeng ken saanna a kayat a sawen a naibasuran dagiti kaso a naipila kobtra ken ni Co.
Innayon na a temporaryo a naikkat laeng ti kaso iti listaan dagiti aktibo a dengdenggen ti korte ken dagus a maisubli iti regular a proseso no maarestar ti dati a kongresista.
Inlawlawag pay ni Castro nga agsardeng met ti panagtaray ti prescriptive period kabayatan a naka-archive ti kaso, isut gapuna a saan a mapukaw ti pagsungsungbatan ni Co uray agpaot pay ti panagtalinaed na iti ruwar ti pagilian.
Maipalagip a pimmanaw ni Co iti Pilipinas idi Hulyo 2025 usar ti travel authority para iti medical treatment.
