LAOAG CITY – Kalikagom dagiti mangngalap ditoy ciudad ti Laoag nga ibabawi ti ili ti Paoay ti pinutar da nga ordinansa a dagiti laeng residente iti nadakamat a lugar ti mabalin nga agkalap iti baybay a sakop ti nasao nga ili.
Maipalagip a naipatungpal paylaeng ti nasao nga ordinansa iti ili ti Paoay idi 2002.
Ti arungaing dagiti mangngalap ditoy ciudad ti Laoag nga addan sumagmamano a tawen a bassit ti makalkalapan da gapu iti panagbaliw-baliw ti panawen.
Inbatad ni Barangay Chairman Gil Ramos iti Barangay Gabu Sur ditoy ciudad ti Laoag a nawaya dagiti mangngalap iti ili ti Paoay nga agkalap ditoy ciudad.
Inpetteng na a no aramiden da met ti kas iti ar-aramiden iti ili ti Paoay ket possible a mangitunda ti food crisis.
Inpakaammo ni Ramos a naidanun ti pakaseknan da ken ni Mr. Arthur Valente iti Bureau of Fisheries and Aquatic Resources (BFAR) ngem inbalakad na a masapol a mapan da mangala ti permit iti ili ti Paoay no kayat da ti mapan agkalap iti nasao a lugar.
Nupay kasta, saan nga anamongan daytoy ti kapitan gapu ta agbayad da no mapan da mangala iti permit ken saan da a masigurado no ado ti makalapan da.
