LAOAG CITY – Natay ti maysa a mannalon/jeepney operator kalpasan a pinaltu-paltugan dagiti saan pay a nabigbig a suspek iti paset ti Barangay Santiago iti ili ti Solsona.
Binigbig ni Police Capt. Chris Anthony Sorsano, ti chief of police iti ili ti Solsona, ti biktima a ni Eugenio Balantac Jr., agtawen 54, maysa a mannalon ken jeepney operator ken residente iti Barangay Juan iti nasao nga ili.
Inbatad ni Sorsano a basar iti inisyal nga imbestigasyon da, agpadaya a direksyon ti biktima manipod iti sentro iti ili ti Solsona a nakalugan ti tractor idi tambangen dagiti suspek.
Inbaga na a nakakumpiskar da ti innem nga slugs ti maipagarop a kalibre 45 a paltog iti nakapasamakan ti krimen.
Kuna ni Sorsano nga awan pay ti pamal-palatpatan da iti kinatao dagiti suspek ken no ania ti motibo iti krimen.
Innayon na nga adayo ti balbalay iti nakapasamakan ti krimen ken iti teorya da ket sinabat dagiti suspek ti nasao a biktima.
Iti agdama, naiget ti imbestigasyon ti PNP mainaig iti napasamak a pammaltog iti nasao nga ili.
