LAOAG CITY – Inbatad ti Department of Health a ti panagwaras ti tuberculosis (TB) ket dakdakkel a problema ngem iti panagruwar dagiti baro nga strain t COVID-19.
Inlawlawag ni Department of Health Spokesperson Undersecretary Albert Domingo a dagiti sakit kas ti tuberculosis ket airborne ken al-alisto nga agwaras kadagiti lugar nga ado ti tao.
Inrakurak daytoy ni Domingo kalpasan ti panagpirma ti Department of Health ti partnership iti U.S. Department of State tapno papigsaen ti panangduktal ken panangagas ti tuberculosis iti Pilipinas.
Karaman iti partnership ti turnover ti umdas nga agas para iti 230,000 a pasyente ti tuberculosis ken 12 nga ultraportable X-ray machines.
Dinakamat pay ni Domingo a nakaawat ti Pilipinas ti mapatta-patta a $120 milyon manipod iti Philippine Country Coordinating Mechanism (PCCM) Global Fund para iti panangagas ti tuberculosis, Human Immunodeficiency Virus ken Malaria.
Segun iti Department of Health, adda ti nasurok a 100,000 a kaso ti tuberculosis ti nairekord iti Metro Manila idi Pebrero ita a tawen.
