LAOAG CITY – Natukkol ti kin-kannigid nga ima ti maysa a lalaki a nakamotorsiklo kalpasan a dinungpar ti naka-kotse iti paset ti Barangay Madamba iti ili ti Dingras.
Malaksid iti pannakatukkol iti akin-kannigid nga ima ti nakamotorsiklo ket nasugatan pay ti ulo ken nagasgasan ti sumagmamano a paset ti bagina.
Basar iti report ti Philippine National Police (PNP), agpada nga agpadpadaya ti dua a lugan idi maipagarop a dinungpar ti kotse ti motorsiklo.
Naamoan a kalpasan a natulid ti nakamotorsiklo ket nasapgud pay ti kotse a nangitunda ti pannakatukkol ti akin-kannigid nga imana, nasugatan ti ulo ken nagasgasan ti sumagmamano a paset ti bagina.
Nabigbig ti biktima iti nagan na a “ Raffy”, mannalon ken taga Barangay Bugasi iti ili ti Banna idinto a ti nangimaneho ti kotse ket agtawen ti 23, maysa a nurse ken residente iti Barangay Dancel iti ili ti Dingras.
Naitaray a dagus ti biktima iti Mariano Marcos Memorial Hospital and Medical Center iti ciudad ti Batac para iti naan-anay a pannakaagas na. Nagtalinaed met ti nangiturong ti kotse iti kustodyar ti Philippine National Police iti ili ti Dingras
