LAOAG CITY – Napagsasaritaan ti maysa a mannanakaw kalpasan nga insubli ken nagpadespensar iti maysa a lola a nagbalin a biktima na iti Brgy Torre idiay Currimao, Ilocos Norte.
Segun ken ni P/chief Insp. Ryan Retutar, hepe iti PNP Currimao, kalpasan a naireport kadakuada nga adda ti maysa a balay a natakawan ti 11,400 a pisos ken nagturong da a dagus iti lugar tano mangiwayat iti imbestigasyon.
Binigbig ni Retotar ti agtagikua ti balay a ni Lilia Tacolog, 60, naasawaan ken residente ti nasao a barangay.
Inbatad ni Retotar nga iti imbestigasyon da ket adda ti nakita da a fingerprints iti nangikabilan ni Tacolog ti kwarta isut gapu na a kiniddaw dagiti otoridad a dumalan ti fingerprints dagiti karruba ken amin a miembro ti pamilya na.
Inpakaammo ni Retotar nga iti sumuno nga aldaw ket nakita laengen ti biktima ti nagpukaw a kwarta na karaman ti papel a nakaisuratan ti panangpadespensar ti saanen a nabigbig a suspek.
Gapu iti daytoy, awanen ti plano ni Tacolog a mangipila ti reklamo kontra ti nasao a suspek.
