LAOAG CITY – Nakita nga agtatapaw ti maysa a bloke ti mapapati a shabu iti 26 nautical miles manipud iti baybayen a paset iti Brgy. Nalbo iti ili ti Pasuquin.
Basar iti inisial nga imbestigasion ti Philippine National Police Maritime iti ili ti Pasuquin, ti mapapati a shabu nga agtatapaw iti ket nakita ti maysa a mangalap a ni Marjun Maltep iti nasao nga ili.
Iti palawag ni Maltep, iti alas-nuebe y media ti bigat ket mannarimaan ti panagkalapna no sadinno adda ti naobserbaran na nga agtatapaw a bloke nga agmaris iti puraw a nakaibungon iti supot.
Innayonna, apaman nga inikkat na ti bungon ti mapapati a shabu nga addaan iti Chinese markings, light blue ti packaging na ken adda ti nakasurat nga A-168 ket insigi nga in-surrender na daytoy iti biang dagiti otoridad.
Segun met ken ni P/Cpt. Romnick Bornawi, hepe iti Philippine National Police Maritime iti ili ti Pasuquin, posible nga adda pakanaigan ti nakita a shabu kadagiti immunan a nakita iti probinsia ti Ilocos Sur ken iti ili ti Burgos.
Mainaig iti daytoy, mapatta-patta nga agdagsen iti maysa a kilo ti maipagarup a shabu ken agbalor ti nasurok 7 milion a pisos.
Inbatad ni Mayor Robert D. Aguinaldo iti ili ti Pasuquin a malaksid iti maawatna a P5,000 a gungunna manipud iti Philippine Drug Enforcement Agency ket mapaayaban ti mangalap iti opisina inton Hulio 15 tapnu pamigbig, pammadayaw ken gungguna.
Kabayatanna, addaan iti biang ti Laboratory iti Philippine National Police Forensic Unit ditoy probinsia ti nakita a bloke ti maipagarup a shabu para iti naan-anay nga imbestigasion ken inventory.
