LAOAG CITY – Nagpanawagan ni Mrs. Marife Penla, agtawen ti 42, residente iti Barangay Palongpong, iti ciudad ti Batac ken tubo iti Laguna iti asawa na a Alex “Bunjing” Baradi, agtawen ti 32, construction worker, a tungpalen na dagiti immuna a nagsasaritaan da apaman a nagturongda iti City Social Welfare Development (CSWD).
Daytoy ket kalpasan a dangdangran ni Bunjing ni Penla adda man impluwensya na iti nasanger wenno awan.
Iti panagturong ni Mrs. Penla iti stasyon ti Bombo Radyo Laoag, inlawlawagna a nabayagen a dangdangran isuna ti asawa na, ket idi laeng Sabado, Oktubre 26 a naminsan manen a nabartek ken nangriribok ti asawa na ket ditoy nga inbuong na dagiti kagamitan da iti uneg ti pagtaengan da.
Kunana nga idi inanawa na daytoy ket kellaat a tinutokan isuna ti asawa na ti kutsilyo.
Mainaig iti daytoy, saan a masinunuo ni Penla ti paglemlemengan ni Bunjing.
Immuna metten a nagkamang ti maseknan iti opisina ti Philippine National Police – Violence Against Women and Children (VAWC) iti ciudad ti Batac, ken kinuda a no saan pay nga agparang daytoy ket maiserbian daytoy ti warrant of arrest.
Kabayatanna, nagtalinaed da Penla ken dagiti dua nga annak na iti barangay hall ti barangay Palongpong.
Mainaig iti daytoy, segun ken ni Barangay Chairman Reynaldo Garcia iti Brgy. Palongpong iti siudad ti Batac a namindua a darasen a trinatarda ti panagriri dagiti agasawa a Baradi.
Segun kenkuana, masansan nga agbarbartek ni Bunjing a mangitunda ti panagapada nga agasawa agingga a madangranna daytoy.
Inbatadna a temporario pay laeng nga agtalinaed ni Marife iti barangay hall-da tapno maliklikan a maminsan manen a madangran ti asawana.
Innayonna a desididoda a pilaan ti reklamo ti asawa ni Marife tapno maikkan ti pagmennamennaanna.
Iti agdama, naammoan a saan pay a nagpakpakita ni Bunjing bayat a maisursurat daytoy a damag.
Immuna iti daytoy, nagkamang ni Marife ditoy Bombo Radyo Laoag tapno agkiddaw ti tulong a maiyadayo isuna iti panangdangran ti asawana kenkuana.
