LAOAG CITY – Nakigtot ni Laoag City Mayor James Bryan Alcid apaman a naipadanon kenkuana nga adda dagiti aglaklako iti merkado publiko ditoy ciudad ti nakaawat ti peke a kwarta iti kallabes.
Segun kenni Alcid, damo na a mangeg nga adda ti kastoy a pasamak.
Nupay kasta, inpanamnama na nga imbestigaren da daytoy ken kitaen da ti kapintasan nga aramiden ti lokal a gobierno tapno maipaayan ti solusyon daytoy.
Mainaig iti daytoy, kuna ni Alcid a ti kasayaatan nga aramiden dagiti tattao ket agbalin a naridam ken siguradoen no peke wenno saan ti kwarta.
Kabayatanna, inbatad ni Alcid a maysa kadagiti napintas a padur-asen wenno idevelop ti lokal a gobierno ket ti QR PH tapno malimitaran ti panagitugot da iti kwarta ken maliklikan a mabiktima.
Maipalagip nga immununan nga inpakaamo ni Miss Mae Vel Tagaban, Admin Staff iti supplier kadagiti frozen meat iti Barangay 16 iti ili ti San Nicolas nga umaboten iti 10 ribo a pisos a peke a kwarta ti naibayad kadakuada kabayatan nga umas-asideg ti paskua.
Innayon na a kaadoan kadagitoy ket manipod iti tiendaan dtoy ciudad ti Laoag.
