LAOAG CITY – Pagpalpalawagen ti Department of Environment and Natural Resources (DENR) ni Davao City Mayor Baste Duterte no apay a nagibelleng ti adu a basura iti sangoanan ti opisinada idiay Davao.
Naikkan ti Mayor ti lima nga aldaw tapno agpalawag maipanggep iti daytoy a banag.
Rumrummuar nga inbilin ni Mayor Duterte iti garbage collectors iti Davao nga ibelleng dagiti basura iti sangoanan ti Department of Environment and Natural Resources-Davao office.
Inpetteng ti ahensia a sumagmamano nga indibidual ti naarestar kabayatan nga agibelbelleng ti basura nga intudoda ti June 4 Facebook post ni Duterte a mangibagbaga a ti Department of Environment and Natural Resources ti maysa kadagiti waste collection point.
Maipalagip nga idi Mayo nga inpaserra ti Department of Environment and Natural Resources ti maysa a landfill iti lugar kalpasan a narpuog ti pagibelbellengan ti basura a nakatayan ti dua nga indibidual ken maysa ti mapukpukaw.
Basar iti Department of Environment and Natural Resources, ti basura ket saan a segregated wenno napagsina-sina ken maysa daytoy a panaglabsing iti Ecological Solid Waste Management Act wenno Republic Act No. 9003 ken ti maibagbaga a collection points ket nasken nga aprubado ti Solid Waste Management Plan ti lokal a gobierno ken ti Implementing Rules and Regulations ti linteg maiyallubog iti Republic Act No. 9003.
