LAOAG CITY – Inlawlawag ni Mayor-elect James Bryan Alcid ti plastar dagiti transport group kangrunaanna dagiti tricycle driver iti panag-pick up ken panag-drop off dagiti pasaheroda iti SM ditoy siudad ti Laoag.
Daytoy ket kalpasan ti panangsaludsod iti pannakabagi ti dakkel a mall no kasano ti husto a plastar dagitoy.
Segun ken ni Mayor-Elect Alcid, Chairman ti Committee on Transportation, immunan a napagsasaritaanda a ti maipangpangruna ket dagiti city franchise ken dati barangay franchise iti Barangay 51-B Nangalisan laeng ti mabalin nga ag-pick up ken ag-drop-off ti pasaherona iti dakkel a mall.
Inbatadna a maipawil nga ag-pick up dagiti tricycle driver no saan a city franchise ken no saan a barangay franchise iti Barangay Nangalisan.
Mainaig iti daytoy, kunana a mabalin met nga ag-drop off dagiti sabali a barangay franchise ngem maipawil dagitoy nga ag-pick up iti pasaheroda iti dakkel a mall.
Inlawlawagna nga iti agdama ket saanda pay a napagsasaritaan no kasano ti plastar met dagiti bus ken jeep.
Innayonna a nangrugida metten a nagplano no kasano a masolusionan ti trapiko ti dakkel mall ditoy siudad ti Laoag.
